مصطفى هلال

هويتك رايدك عشره.. ماردتك تمر ذكره

 يالمطيني ظهرك روح ما حاجيك.. 

خليك بسكوتك وضحت الفكره

 عشكك مشتها وياي.. 

واني اعشك على الفطره

انت وصاحبك من يمي من تفوت..

ويه اجدامكم تسابك العبره 

وأغزل كمت بالحسرات..

واتخلبص عليه الخيط حسره انعكدت بحسره

واعرفه الكايدك ما يجرح أي احساس.. 

بس انته التجيبه اكبالي واتعبره

وادري الكايدك ما يندل اكعد وين.. 

بس انت التجيبه وياك ..

تعرف زين اكعد جوه ياشجره 

خاطر واهسي تكسره

واوراق الربيع تضامنت وياي..

كبل وكت الخريف تحولت صفره

اني بواهسي المكسور كاسر واهس الشجره

خضار بروحي ابد ما ظل بعد بجفاك.. 

روحي تحولت صحره 

وشفايتلي لو صحرة 

الصحاري تميزت بيها السكوت يعيش

وانه هوست صحرتي الأطرش تثبره 

انا بصدري صريخ اقوام ملعونين.. 

صارو للبشر عبره

روحي تهدمت جيف انته صرت الساس.. 

طاحت من رحت وانقاذها امن احساس.. 

وانه الماتوب الم بيهن.. واسويلك كلت حضره

بيهه اني الوحيد يطوف

انت ايمام ما معروف

وابد ماتوكف لملهوف 

صار اسنين من انخاك.. 

مامره اسمعت بشره 

ولاجنك هذاك النايم بصدره

بطل بعد ماينخاك .. بسك تاكل بعمره 

امدحك مدري اذمك والله حرت وياك.. 

والمثلك عجيب امره 

على القبلة أطلبت من الله كون انساك.. 

افر بمحبسي ماتقبل الشذره

وصلاتي تحولت صارت صلاة الخوف

وبالسجدة الأخيره انكلبت الفكره

واتغير دعائي واختلف شطره 

يرب ناسيني لاتنساه

يرب جافاني بس اهواه.. 

وادري بعذره ما مقبول..

 اريدك تقبل بعذره

 اريدك تقبل بعذره