حسين القاصد
الهلال مضكور بالكتب ، ورب العالمين يكول (يَسْأَلونَكَ عَنِ الْأَهِلَّةِ قُلْ هِيَ مَوَاقِيتُ لِلنَّاسِ وَالْحَجِّ) والشهر الوحيد الذي يتفق على بدايته المسلمون هو شهر محرم الحرام لأن الشيعة ماعدهم مشكلة اذا بدا الشهر مبكرا فكل يوم عدهم كربلاء !! وكلما يطول الشهر احسن وأثوب !! لذلك لايختلفون ومادام الشيعة لاينزعجون فالسنة لايتعبون انفسهم لأنهم شوكت مايبدون محرم يلكَون الشيعة مستعدين .. وسالفة الهلال مضكورة هواي بالكتب .. حتى بالقرآن (القمر قدرناه منازل حتى عاد كالعرجون القديم) والانسان لمن يكبر ويصير أحدب بس مونوتردام !! يصير يشبه الهلال .. والهلال يشبه الموز و(الموز حق !!) بس لاتفتهموني صح لطفا .. لأن حتى ابو الطيب ضاكر الهلال هواي بس يعترض على تذكيره :
ولو كن النساء كمن فقدنا… لفضلت النساء على الرجال
فما التأنيث لاسم الشمس عيب … ولا التذكير فخر للهلال
يعني الهلال ليس له فخر في التذكير !! يعني حتى اذا يرشح للانتخابات يكون مشمول بالـ (كوتا ) !! لاهيجي ماكو شي .
