انيس العيساوي
ما اشوفك دمع شفتك شموخ تفيض
وما ابريها ذمه الشافتك مكسور
اشلون اقنع ذليل ويمك العباس
لو طايح ذليل شلون يطلع نور؟؟
ما ادري شعجب ما نافخ اسرافيل
بعد يا طف يتاني وينفخلها السور؟؟
غفه بيه السكوت وصحى شجم كابوس
وعاشن بيه مدري شكم عمر مجبور
وصديت اعله طفك وانترست احلام
وصحى فارس البيه وكلت ما معذور
اليشوف الحسين بروحه رايه تصيح
ما يبقى ذليل وعالارض مشمور
اشوفنك قصيدة بذاكرة قدوس
يقراها محرم يندم الزاغور
وتخضر حياة منين ما صح موت
ويصحى براسي كل مبدأ كبل مطمور
شكرا يا حسين لوكفتك والصوت
لو ما دمك يظل الحلم مهدور
دمك ما نشف لسه اعله كاعي يفيض
وطلعت جم شمس ما نشفت المشرور
طغه وجه الظلام ومات جم بستان
ما شفت الصبح لوما ضواك يثور
امن اشيلن ثورتك من راسي والايام
مايرجع ينام بشجرته العصفور
ولا ضاك الهلا ولا مرحبا الخطار
ولا جدر الكرم ظل اعله نار يفور
كرم عندك يغزر حتى ويه السيف
ما فشلته مره وكتله ما معذور
يا موسم التوبه لكل ضمير يموت
متت جم مره والكاك بخيالي طيور
اشم ملكاك من اطلعلك من البيت
امن اشوفن دمعتي كبل الاجدام تزور
بس يومك جمعها الفقره والتجار
تتمشه الصرايف كايدات قصور
اصد لهيبتك واتواعد بفردوس
لغيرك من اصد يترس عيوني كبور
تمنيت الحياة وياك رمشة عين
واضوكنه الخلود بملحمة عاشور
