تحسين العكَيلي
شكَـ صدر الحزن من تذكر حسين
وارسم صورة الطف من تذكره
صدر حسين حمـل كربلا وخيل
ياهو الكَالكم كاتلته عبره
نزف بجروح طفه الفين عاشور
وعلى اغصان الورد خضرت حسره
لذالك ما اقر بعبرة حسين
بس واجب اقرن بيه عبره
انسكَه التاريخ من جفوف عباس
وعرفنه الوفه بكَصة حسين كَطره
حسين اول سفينه بشحة الماي
الصبح شامت لهسه يطوف كَبره
انه الدمعاتي شكَت خد الطفوف
ساعه تصير روج وساعه جمره
حب حسين دمعه بعرش عاشور
الوكَف عجز الشعر بضلوع صدره
قل بسم الحسين اطرد الشيطان
وألله ينزل املاك اعله شعره
الـوصف صبر زينب جبل باقلام
خل يوصف نحر بل رمح شذره
انه بظل الخيال ارسم نهر ماي
وخط بجوف جف عباس صطره
الدمعه ابعد جفن السمه اعله الكَاع
وصارت ندى هموم بريج زهره
حزن فاطمه بكَد دمعات عاشور
اجت جابت ضلعها ويوم كسره
تحول كله عبره بريج عطشان
شاف امه وشمر عالكاع نحره
يارمز الترافه بحر الطفوف
الك وصط الكَلب دكَيت حضره
