منتظر الشرع
دمعه ورمح عمرك بالحرب جان
زغير شلون تحمل شهكة الموت
السهم ماقاصدك من سافر وياك
يمكن ماخذك من نبرة الصوت
جهنم جان صدرك وأنت عطشان
أزمة ماي جانت قطرة متفوت
صدر حسين كبرك والجفن نور
على هيئة بشر مخلوق ياقوت
ملك الموت يخجل لو يلاكيك
على كدك يجيب منين تابوت
الا من ناصرآ بأذنك مواعيد
ياكاروك شالك والهه تانيت
أمك ودتك مو تشرب الماي
تجيب الماي رادت وأنت ضحيت
متحزم بغيره تفك الكماط
طفل لكن بعزه أجيال ربيت
توضيت بسهم من أذن الموت
فرشت المنحر وبدماك صليت
أزغر جندي جنت بجبهة حسين
شلت روحك بجفك من تعنيت
برز نحرك قبل سيفك بالطفوف
رضيع أنت وعلى مهدك تنحيت
دخلت المعركه بكماط وأنفاس
كماطك والنفس مكطوع رديت .
