صهيب الحبش
مو عادل جنت بينك وبين الروح
حقيقه ومن افك باب الحجي اسردها
الف مره افكدك لي مايصلها الدور
روحي وحتى بس لا تزعل افكدها
من اشتمك رذاذك ريتي يوصل جان
فصيلة دمك امن الريح احددها
خالفت الشرع ماظل ثلث للماي
ابشراهه همومك اكل جنت من عدها
مكانه انطيت للكلشي يتعلق بيك
صابونة غسيلك جنت امجدها
صح كبل الشمس لو ما تحركك
خاف الكيلك مكان وتسكن ابسدها
ضكت منك برد يل كلت بية احضان
جمر حرب الكويت اتذكر ابردها
عفتني ومن رجعت ابراسي مية ياس
والف امسافرين ابروحي رددها
ايوكعني الحزن والكبرياء اتكوم
دفعت ام ابولاده الخطوه امددها
مثل رجعة حمامه العشها وكت غروب
نسر عارض دربها ابمخالبه وشدها
تحاول عاندت تنهزم منه اتريد
ومن شدة لزمته تمزكت يدها
تسولفله بحزن بالعش بنات ازغار
جوعانات هسه ومارضه يهدها
ثق ما بالغت بس بالضحك بجفاك
اعله كد جيت الشماته الضحكه امددها
ومن تمشي الشماته الضحكه طفله اتصير
وابن عمها الحزن وبعصه يطردها
عفتني ابنص وحوش اشتهت روح اتطيح
ادزلها الكرامه وكوه تسندها
وحوش ابزي بشر وسنونها امن سيوف
مخالبها بمبارد كاعده تحدها
مثل دركة شجاع ابوحده كابل جيش
والف نشاب واكف منتصب ضدها
علي هدن سبع رد تسعمية قوس
والكثره اغلبته وميه ما صدهاِ
عليي هيج الشماته حلوكها اتذب نار
قسم احترك بيها وقسم ابردها
احلام الكبل وصلن زحل بجفاك
ابعد خطوة معوق صارت ابعدها
انا بدونك عزه وجنازه بيه اتعيش
ريحة موت روحي تفوح من عدها
انا بدونك جروح اتطول حايم حيم
وبس نسيانك اليكدر يضمدها
