يحيى العلاق
يمر عشره محرم والفلك يندار
اشوف الدنيه تحزن تنكلب حمره
تحد حتى الشمس تلبس اثياب الليل
تركض للكسوف وراسهه اتطبره
ويهب الشمالي وتلطم الاشجار
احس موكب يصير العالم اباسره
الغيمه علم والنجم سماعات
وياسين الرميثي امنلكمر يقره
ولزوار ابد ماشوفهم زوار
جنهه ادموع تجري ابوجنة الحضره
دمعنه امن الجفن مومثل دمع احسين
غمض جفن عينه ويبجي من نحره
ولطمنه اعلى الصدر مومثل لطم احسين
ينزف ولحوافر تلطم ابصدره
صفه هوه النهر وبصف نهر مطروح
روه الدنيه ابكبرهه وماشرب كطره
الفرات اتعبره تكدر بس ابو السجاد
ياتاريخ هذا اليكدر ايعبره
وقع للشهاده ابدمه لجل الدين
وابو فاضل بصم باليمنه واليسره
فزت ياسيدي وماشبه يومك يوم
وبعد عباس اخوك اعيونه الك تبره
ترجعله الجفوف ابكل شهر عاشور
وبقدرة اله ايكوم من كبره
ياخذ جربته ويفتر على الزوار
راكب غيرته وماراكب المهره
مايحمل بعد يلكه طفل عطشان
لان شايل ابكلبه امن العطش جمره
ولايحمل يشوف اعيال مسبيين
لان مشهد رباب وزينب ايحضره
ويغضب ونته تعرف لو غضب عباس
تتراجف الكاع اتكوم من حدره
عفوا سيدي ويخوني التعبير
عاجز والقلم خجلان من حبره
الشاعر بالمدح يرفع امن الممدوح
بس انته اليمدحك يرتفع قدره
بس انته اليمدحك..يرتفع قدره
