منير الميالي
جف ويمه صوت تسمعه كل الناس
دنيه الغركاهه الموت
متروسه عطش من حركه العباس
احساس العقيله شكثر شايل ضيم
وتصيح اليتامه بصوت عطشانين
تمسح روسهم والعطش كله يزول
غيم جفوف اديهه منكبات بليل
وبواهس مطر تترس هواهه انفاس
السمه خط احمر بمعنى المطر ميفوت
شك السمه وجاب الماي ابو النوماس
يا قبله شجاعه تطوفلك فرسان
يالشايل خجل ما شاله اي انسان
النجم يتنخه بيك وصاح يا نبراس
كبل ماكو نجم بخدود وجه الليل
وظل يبجي الكمر عايش بوادي الويل
الكمر طخ راسه والعباس ما طخ راس
بلونه الماي لحظه امنيته راد يصير
ابو فاضل نقي وظله بهنس ينباس
من كد ما ترف صاير بلون الغيم
ولبست لون كلبه وحجت الحجاج
ومن دمعه يسيل يريد دمعه الياس
شايل غيره كد ما يوفي للحوراء
وعصر بيده الوفه من منه رادت ماي
بيهم دين عايش موت الوسواس
حط بالجربه عينه ورجع ما حط ماي
وعلى كد ما نقي تشرب خياله الكاع
وطك بيهه ورد ميكطعه دك الفاس
ويا عباس
فد موضوع كلش خارج الموضوع
انتم طفكم اعله الدين
واحنه طفوفنه اعله الكرسي والتعيين
نخاف افعالنه من النار محد عرف بينه حسين
طكت بينه شتله اه من دموعنه مبينين
ما كلك بشر نمشي اعله حد السيف
كلنه ذنوب عدنه هواي
والحكام هم هواي
وذريه محمد طغت فوك الكاع
باكو خبزة الفقره
متكفله اليتامه ايتام
والحكام منهم كام تتبره
البيهم زين ما مقصود خل يتكتر بلا خوف
محد ترس عين الكاع
يالتارس عيون الناس كون تشوف
كضينه العمر عميان
والمن نشتكي والليل عثرة شوف
يا مولاي
شحجيلك بدنيتنه
بشر عدلين دفنتنه
ردنه نعيش مثل الناس
فوك النار ذبتنه.
