كنا في جنوب القلب ، بين حواضر أهلنا السومريين (عند أهوار الناصرية)
فجاءني النداء…. وين انبات….. ؟(اين نقضي ليلتنا) ….؟ فأجبت
***
وين انبات…. وين انبات ….؟ خلنه انبات…
مابين دوحة گصب…. وعيون ذات وذات
باحضان شوگ النهر…. لو روَّن احديثات
أوي اهلال التراچي ورنة النفحات
خلنه انبات…..
هلبت يشگ روحه الضوه.. ونفرش محبتنه سوه ..وسادتنه ذرعان وغوه ..
يتنادمن هات وهات ..
يزهن سوالفنه دلع … اطباعهن شوگ ونبع .. اينشفن الروح امن الدمع..
ومن الترف شبعانات ..
انحني اصابعنه فرح ..  انداوي عله كل جرح .. نتناسه وجهك ياصبح ..
الليل يسبح موجات ..
خلنه  انبات .. نهجر كل حزَّنه وطور ذاك الفات
ونطرب بأبوذيه وشجن .. أحلامنا الراحن يجن .. نلبس عوافي ونطمئن ..
عشتار ويانه اتبات ..
إرموشنه إيلمن غزل.. ميمرَّن ابغيض وزعل.. ونترس إچفوف امن الأمل ..
مامش بعد كل آهات ..
ونرسم على وجه الماي .. گلبين دگن فد راي .. ليلة ويضيفن بس هاي ..
بهداي ذن خمريات ..
خلنه انبات .. بگلوب العشگ نتغطه بالنجمات..
أوي اطيوف السعادة وحيل الكحيلات .
وننزع من خلگنه الآه والدمعات ..