جاوينك يمن بسمك تنخيت
اوصبح بمرك دليلي وانت تآمر
جرح كلبي هواك وانه ضحيت
اوتدري اشكد كلف جرح الضماير
×××
خون اشلون تهوه وانت معذور
خون ولاتواني وانه راضي
الجميع اعضاي مرخص واطلب انحور
وعن كل التفعله انه غاضي
اوهذي موش بيدي تدري مجبور
خصيم انت ابهوانه وانت قاضي
حرت مدري شكله والله مليت
ومن انشد جواب النشد حاضر
لشخص المايحبك ليش حبيت
ولفك عامد الكسر الخواطر
×××
كسر خاطري اوجاوبني بجلاي
اشوطي مثل زهرانه ابزهرهه
ودك جرف الصخر ورجع على الماي
وكل صدمه يظل شاهد أثرهه
اغض طرف الوصل عن داي ودواي
وروحي اتريد تعويض السهرهه
تنشدني وتكلي ليشخاويت
نهارك هايم وكلبك مساهر
شنو انت غشيم وهيجي سويت
كلبك بامجان البيه عامر
×××
انه اعلى النفس من اخذ اعهود
اكول اتجلد ولازم اعوفك
لجن كلبي رجيج ومن تجي اردود
اعيوني اتريد توكع من تشوفك
واريد انسه هواك وحبك ايزود
بكثر خوفي عليك ومني خوفك
ابني البيت وانت اتهدم البيت
وانه ارخه الرسن بهواك صاير
اريد اتحس مته وتكلي حسيت
ولعد كسر التكسره اتصير جابر
×××
هويته وعرف لن انه هويته
اولسباح الكلب سويته اله رجاب
حط رجله وتولاني اوليته
وياويله اليطيح ابولية احباب
يعذبني وعذابي انه اشتريته
يلكد وين يامر وانه انساب
وانه الجبت جمرة اوبيدي خليت
اوأصيح النار اجت يهل الضماير
انه اوياك هذا المثل ياريت
الكاعد بالنده اويكسر الخاطر
جاوينك يمن بسمك تنخيت
اوصبح بمرك دليلي وانته تامر