طشني شوف
او خلي العميان تقره
وخلي دمعات الفرح
نهران ري
ابگاع عطشهه بختها
وحوبت العطشان شارة
تفضح اللي حاف فقره
ابغير ضي
طشني شوف
واخذ من عندي صلاتي
للوطن تحضن صلاتك
بسملة وچفوف بيض
ودمع قربان اعله چفه
ايشيل روحه
للوطن ناذر حروفك
تتحد بحروفي چلمة
وعافية وصحوة نشيد
واغنية اتفزز مشاعر
ما حچت بيها الحناجر
لا عزف ونه الضمير
طشني شوف
ولاون ابهمي المتاعب
للوطن منذورة روحي
گبل ما اترك الصلبي
واشبگ احضان الترائب
وانولد صنفي فقير
اخذ بيدي اعله المعامل
بلچن اتحرر واعوفن
عوز ناس
يا هو التسأله اعله حاله
يصيح عاطل
يعني خط الفقر شامل
يعني لا انهرلي سائل
يعني مبيوعة المعامل
يعني هذا المطر كامل
جوع مر اعله المكاين
تحتضر مصيوبة حمه
والايادي الگبل تنتج
هسه تركض عالرواتب
والمدير ايبوگ همه
طشني شوف
ابوسط هاي الناس
واجمعني رسايل
شوف شنهو اللي تريده
ونّة الايتام ودموع الارامل
خمسة في مليون صارو
لا اكو واحد رعاهم
لا طلع دگ صدره كافل
طشني شوف
وطوف بيه
ابحرم كل الجامعات
ما شفت دارس تعين
حتى تتحفز ولدنه
وتحلم ابطعم الحياة
بالعكس اهل الشهايد
ما لگت فرصة عملهه
حتى تدفع حاويات
واللي ما عنده شهادة
يمنحه (مريدي) اليريده
ويشغل اعله الدرجات
طشني شوف
وللوطن خط القصايد
خل شعرنه ايصير طلقة
او وردة بيدين اليجاهد
وارسم احلام الشعبنه
بلچي يتحقق املنه
انشوف ماي او كهرباء
والزغار ابنوم آمن
لا مرض لا بيئة وصخه
لا بطالة او ماي آسن
لا مهجر ترك داره
وبخيام البؤس ساكن
يعني دولتنه أمينة
ونعرف المعروف بيهه
ونلغي المنكر الماجن
والقصيدة اعيون شاعر
بيهه يتصور وضعنه
وانته يالتقراني عاين
طشني شوف وبيه وازن
للوطن للناس سولف
وانتفض لا تبقه صافن
غير الواقع الفاسد
حارب ارهاب الدوائر
والتهي ابداعش الحاقد
جرد اسيوف القصائد
وحد احروف القصائد
والعن اهل الطائفية
والعن اللي زرع بينه
فتنه اسمهه المذهبية
الدين ما يرضاش بينه
الذبح يصبح عالهوية
طشني شوف
وادرس ابعاد القضية
كلنه گلنه الدين لله
والوطن للكل هوية
والوطن للكل هوية