مو صعبة اشوفك شمس بالليل
ولا صعبة ..
ادوّن كلشي اليصير
مثل شبگة شمس لاطراف العيون
شبگت المستحه ابلايه
محاذير
چنت اوي الرواية ..
اثنينكم خوان
بجناح السوالف رايد اطير
علّمت القلم ..
ينزف غناه ادموع
حتى ايبلل التاريخ من ايجف
ومن تنشف لهات الگاع
واتغيّم افكار الناس
انت اوي القلم صفين
صف ابصف
انه اتذكر ..
بسبعينك غزلت المستحه
(بمغزل ) الاهات
من رفضت الريح اتصير عنوان
لابن افقر اعگال .. واغنى تابوت
ليهسه الرصيف ايغني موالات
جمعه وكاظم وعريان
هنيالك ..غفيت بشارع المركاض
وانت ادرى ( الرفاق)
اتخيّط الوجدان
صح چنه شباب ونحلم بتابوت
ونعارك ضمير السلطة ..
من اينام
بس …
تبقى النوارس لافتات بليل
اتضوي اعلى الفلح
واتگعد العمال
من چان اليمين ابلا ضمير
ايعيش
عودنّه اليسار ..
اعلى اليتامه ايوزع الخبزات
( وره السدة)
چاكوچ وقيامة .. ومنجل وذباح
يحسب عدد خطواتك
على الممشه
ورغم كل الظلام ..
ودهاليز الغير
من كل جدم تطلع كاملة الغبشة
تعلمت الحچي …
بدربونة الاحرار
من طف الحسين وكارثة نعشه
چنه ازغار ..
بس انغار ..
من چلمة ( فهد ) لو ردداها الغير
ممنوع اللفظ
والتشكيك .. والاخبار
واخياط الجرح والرسم
والتصوير
مادام الرسائل تنذبح كل يوم
ما بين الاقصاء ..
وغرفة التخدير
(عبد الله ) …
تعال اقراك
مل مني السكوت وملّت السكتة
وهذاك ابني ..
گبل سبعين عام ابجيته
بشرته
تعال اقراك …
خل نفرح فرح
ما كفه هاي الناس
بس …
اول جرح صادفني ضمدته
ظل ينزف جهاد بساحة الاموات
ورغم كل الظلام بكيفي ..
وصفته
( عبد الله ) …
خلف السدة عالم
طبگت الليل بليل
حتى الشمس ..
توصل للماعرف وكته