غريب اتموت…
عمت عين الچفن والگبر والتابوت
منكر ما عليك ايفوت…
اصيرن دچت امغيسل
وصيرن لك شذر يتباها بالياقوت
وحچي اوياك مثل الأم
يمه انته عدل..
والحزب مالك صوت
وصليلك صلاة الوحشة للغايب
چذب ما غايب انته البحر وانته الحوت
صوتك بالغنه ما خاف من الموت
مو عيب اليموت بشام
بي زينب.. ولا موت البشر منحوت.. ولا موت البشر.. منعود
يظل اسمك علم..
ويرفرف على الصاري
وتظل الاغاني ابصوتك اتغرد..
حلاتك بلم عشاري
بيادر خير من غنيت بالبصرة
شوقيه نغمها وانته زنجاري
وكفت ابوجه دكتاتور
ما طخيت راسك لا خنت حزبك
وانته الأدره والداري…
وانته الأعرف الداري
وحگك يا فؤاد او كل اغانييك
وحگ كلمن كتبلك شعر
منهم انا واشعاري…
وانته المسرح القاري
وانته المكرفون اليصدح الداري
اعتب عالمنية الكفتك
من بيت بچاري…
اعتب عالميته الكفتك من بيت بچاري