لا يبني اجه الطارش
وجايب كل مكاتيبك،،
بست الباب ولطارش
ياروجة نبي اجيبك!
أحس ابگمرة الديرة انتشت وي جدحت اسهيلك..
وخذني الكيف نافورة وفدعني الشوك
يم رملة مناديلك!!
ارتويت وثلجت روحي وصرت غيمة وعبرت من لكحط بسكوت
جاستني وطفت جمرة مواويلك!!
تهفت ولدرب يضلم
وحس مشراكة عيونك مهر يركض!!
يسحگ ولعشب يتناثر باليلك..
ولگيت احزاز كصبتنه العتيج لهسه بعده أبيض!!
وشفت ثارات تضوي نحدرن ابسيلك..
من هاي وعرفت الگيض
من هاي وعرفتك فيض
من هاي وعرفت اشلون اناغيلك..
مادامك سفر احمر..مادامك جنح احمر
كل رگبة شلب بالگاع توميلك!!!
بدي اعتب وخافن من خرز روحي
لون شتت منو يلمهه..
بعد صفصافة الجيران ماكسرت جذرهه اگبال اليذمهه..
بس وداعت اعيونك
لهسه الماي من ايجيس حنتنه ينز دمهه!!!
أبوس الگاع جي لنك عرگ منهه وعرگ مني،
ليش اتوسل المزنه
لون طاري العطش ضكني،،..
كل عود ايعرف موته حرك يبني!!!
ولا غترة اتفنت وجنه
ايتلاهث ليش اضم حزني..
أمن ياغريب اهلك
أمن ياعزيز اهلك
أمن وعشك البردي ..
مايعله الرمح عالثار مادام النزف يحدي!!
بالك تشغل اضنونك عوف ادموع البخدي..
مو حتى السواجي اتحنب من الطين
اذا مامش هوه ايعدي !!
كافي أبعاد..
ماضلت ولا صحوة صبر بينه..
اهلك كسرو المشعل
يبني الجذر يهوه الظلمة البطينة!!
يالاهلك شعب مو بيت
من شفنه الوطن محتاز كال اطوني وطينه..
ومن شفنه الگمر ذبلان خفنه ايموت
فكد ضيه وفكد لونه
ركضنه بس رفعنه الماي!
رد وفتش عيونه وجرة جم ساجية بعينه!!!
يبني…
الطارش البسناه
ما باسك!!
ولا جالك ولا گلك رسايل جايب من هلك..
ماگلك ابوك اليشبه الگيعان !!
ونت السنبلة اتشبهك..
ماگلك بعدهه الشمس يا شباجنه أچلك..
ما كلك ولا كتله شعجب يبني!
على اخر رساله جمدن عيوني………..
من وين الوطن ينشاف!!!
ولن صوت
ابضرف كل ريح يتعبه،،
من عدهه وطبعنه رسومنه ابرملة شگارك ذاك
من گال الوطن ينشاف من شعبه!!
من گال الوطن حرية من شعبه!!!