الماي راكد..
والنهر خلكه طويل اهواي
جرفين المناحة اتناطر الخطوات
ياثكلك صبر أيوب
ياحزنك عراقي أمن الزمان الفات
مرات…
النهر يصفن شجاله الماي
لاصوبيني كسرن خاطره
ولاناس..
وهواس النهر وهواس
ياماي أنتخيتك تنكل الخطوة
ألبخت ماظن بعد ينداس
،،،
الماي شارد..
والنهر خلكه كصير
ألشمس من أتغيب
يتباهه الأمير
وجرف ينشد جرف
عن حسبة الماي
وليش شارد.. وين نيته
الكتب للوادم وصيته
الصاح بالنايم عله أكتار الحصير
الماي شارد وين
والدنيه ربابة كاولي وبيد الوزير!
،،،
الماي شاهد.. عن زمان الطف
عله الصار
وبله الدنيه بله
الماي شاهد جزع من حاله ونشدني
: الدنيه هاي الدنيه كلهه؟
جاشجاهه.. وكلهه صارت كربله؟