يالرايد تعرف أوصافي
اِو آنه اِمنين
هاك أوصافي اِو عاين زين
اِو كون فكرة
آنه اِشروگي
أسمر من نخلات البصرة
من هور الچبايش ريحة العگيد
من سوگ الشيوخ اِو طيبته اِو تمره
من الناصرية اِو اِسأل التاريخ للذكره
من شيمة فهد من بدعة الشطرة
سموهه الخلگ والاِسم لايگ حيل
اِلهه موسكو الصغره
وأشكر شعري
من بلوط اِجبال اِبلادي
من زاخو الموصل من عقره
شارب ماي الشطين آنه
نور أفكاري اِو كلش حرة
أهوه التجديد اِو يهواني
ايسموني الوادم علماني
واِبكل حرية
الوالد يعشگ واِيحب حيل العلمانية
ساكن بالزبير اِو مذهبه شيعي
(سبل) وبجامع السنة
يصلي طبگ يوميه
واِمي اِچتاف لو صلت
خمس مرات
لأن مذهبهه سنية
بس عدهه علي ( اِو يا لا اله اِلا الله)
قدوه اِتقدسه هيه
واِخوي اِيصوم واِيصلي
ومشي بالأربعين اِيروح
بس أفكاره شوعية
اِتزوج وحده من تلكيف
أعتقد لا جزماً مسيحية
تزور النجف كل رمضان
اِو تروح الكربله اِبعاشور
متعنية
اسألتهه اِمنين اِنت اِ وين
گالت كاكه كردية
واِختي اِتزوجت واحد يحمل نزعة دينية
يناقش دوم .. بس اِبصيغة علمية
واِحنه اِنعيش كلنه اِببيت واحد
عالمحب واِبحسن نيه
يجمعنه هدف سامي يرد الروح طاريه
اِهو حب العراق .. اِو ياهو الاِيجاديه
دور واِگلب الدنيه
عراقيين كلنه ..
واِبمحنة اِو شوگ
تجمعنه العراقية
