وحشة الروح شْوحشهه
الضيم ثيلة بروحي تعله شما احشهه
فرفحت روحي بعطشهه
تنخه كَطرة ماي يرويهه عطشهه
لا هرش يرويني ماي
حتّه غيم البسماي
غدت كل غيمة تلكَـ لكَّه بعطشهه
وغرّبت هالروح جنّازة بنعشهه
لاجن مكابرهه رد بيهه تفطّن
للسنين اللي تعدّن
عالحساب الماهو عالظن
لاني من العاشرتهم كَلبي أمّن
ولانش شاري اعله الخضر واترجّه بلجن
صبخة كَاعي وممحلة
وخضّر العاكَول البروحي عله
عفيه روحي وياخلكهه شمطوله
هديب… وبثكَل الهموم محمّلة
واهي الدنيه لو صحت
ومن سوالفهه استحت
وللمدامع مسّحت بجفوفهه
وجايبه سنين الفرح وطيوفهه
ورادت انسه شواكحت
انسه…شنسه
انسه دمعي
انسه ليلي
انسه طول السكتة بيه
انسه شمعي
انسه انسه طبع الماهو طبعي
انسه يادكَت الكَلب دكَّه اعله ظلعي
انسه طعن اعداي لو طعنات ربعي
الياكت تلتاف روحي
وتنسه والله مخبّله
مْخبّلة روحي لَوَنْ ترجه يرد بيهه الشباب
لا والله مخبّلة
لو ما تشرعب
للتودي دنيتي بشبكَة هله
اهي دنيه…لو تكت سيولهه
موش مكَصودهه تروّي رويحتي
تريد تروي سنين من عاكَولهه
وبين مد روحي الاجه تعبان
ينده واغفيت عنّه
وكَفتي اعله اعتابك
وندهتلك
ندهت العين الجفنهه
ندهت الشجرة الغصنهه
نهت الوصل الينسّي غيابك
وبين شوفك ياحبيبي الجان الي
وبين شوفي الجان بيه السورباني انكَابك
وجزرك الكع ماي روحي امن الشواطي
وجزر روحي اللملم امّيّتي اعله روحي
ومادريت
شكَ غميج بروحي وجع اصوابك
وبين مد روحي الي
وبين ما ادري ودريت
وبين حلمان وصحيت
لنهه روحي تغنّي الي
افّيش ياريحة هلي
وبين مدّي والجزر
فاض وي روحي الحنين
وماتلمّه جروف سد
وماتلمّه جروف سد
