دخان روحي دخنت .. لايطلع ولا ينزل 

من الريه لعيوني صعد .. ضليت انا متعلعل 

مايرضة يطلع للهوا…   بلگلب ظل بس، يفتل 

ثاري اليدخن مو سوه… كل واحد وافكاره 

واحد يدخن من القهرنرگيله ..والثاني لف اجگاره

والثالث من جور الدهر… دخانة گد مايغزل 

دخان روحي دخنت .. لا يطلع ولا ينزل

من الريه لعيوني صعد …ضليت انا متعلعل

دخان روحي دخنت،، ثاري القهر تاويها 

منين مادير الوجه… الگه الفگر تانيها 

ماتعرف تفرزن بشر… اثق بعما ثاريها 

تمد ايدها تحوش الرطب… ماحسبت حساب السل  

دخان روحي دخنت لا يطلع ولا ينزل 

من  الرية لعيوني صعد.. ظليت انا متعلعل

دخان روحي دخنت …ما شافت  لاحظ  لا وعد 

الواوي ياكل بلحم ……..والاسد ياكل بلسعد 

لاريه ظلت لا چبد……. قررت ادنگ ما اصد 

ما اصد لاشوف القهر .وثاري، القهر، مثل الظل 

دخان روحي دخنت… لايطلع ولا ينزل 

من الرية لعيوني صعد …ضليت انا متعلعل 

ياروحي اسكتي للهرش… الحكم لصحاب الكرش

رعيان همه بلطرش… الحگلي يارب العرش 

الحنطة الهم والجرش . ودنانه ليه المأكل 

دخان روحي دخنت… لايطلع ولا ينزل 

من الرية لعيوني صعد …ضليت انا متعلعل 

صرنه مثل قصة جبر من امه يطلع للحد 

مسجل بالورقة وحبر.. اسمه ازلمه عند العد 

ياربي الواحد ياصمد  اعيون كل لص بالرمد 

ملينه بس انته السند، ما ظل بعد عدنا حل

دخان روحي دخنت لا يطلع ولا ينزل