اضحك دغش للوكت .. لو ثگل بيك اللوم
واهذي بسوالف چذب .. وادمنه اخذها النوم
بيع الضمير ابفلس .. لو حل عليك السوم
واكتل نثايه الشرف .. خاف اتحمِّل فد يوم
دنياك خرزة نذل .. طاف ابسماها البوم
خل تنشد أهل الصدگ … وين الحميَّة اشلون
غمُّض اعيون العرِف .. لو گالوا اشيگلون
شاعر..طفل..مجنون!!
أبوجه الأوادم ندم .. يالدنيه شنهو الصار
تدري بگلوب التبن .. طاف بثر تيار
عمرك حلم مرتخي .. غرگان وسط العار
رحمه المشي ابلا گلب .. نسَّاني أخذ الثار
لو وج مضيف السلف .. شعليَّه غاد النار
دخان عمرك صعد .. مذبوح مايدرون
غمض اعيون العرف .. لو گالوا اشيگلون
شاعر..طفل..مجنون!!
** *** **
احچي بسوالف عطش .. وشفافي صارن بيض
والريَّة تيبس غفل .. مايك لغاد ايفيض
گلبك سفينة غضب .. تدوي ابحور الغيض
بسكوت مات الشتا .. والگيظ شايل گيظ
تجري بحروف الشرف .. نهران دم الحيض
انگل سوالف صلف .. وامشي بدرب مسكون
غمض اعيون العرف .. لو گالوا اشيگلون
شاعر..طفل..مجنون!!
ماتت أوجوه الخجل .. صوت النثايه ايصيح
مكتوب معنى الشرف .. برمال اخذها الريح
بالگصة ماظل عرگ .. والغيرة نگطه اطيح
چذب السوالف طفح .. ماظل مچان انزيح
صافح اچفوف النذل .. للدنيه ظل ممنون
غمض اعيون العرف .. لو گالوا اشيگلون
شاعر..طفل..مجنون؟!!