حسين القاصد
العيون مضكورة هواي بالكتب .. حتى بالشمال يشربون ماي من (العيون ) يعني مو من الحلكَـ ، والشعر العربي كله عيون !! حتى اكو قصايد يسمونه من عيون الشعر العربي واكو معجم اسمه معجم (العين ) وسالفة العيون طويلة ، يكولون اكو واحد شايف هايشه يم الجسر ومتسودن وكاتب قصيدة يكول بيها ( عيون المها بين الرصافة والجسر .. ) وهذا حبيبته فرحانه لأن حبيبها يسميها هايشه !! ماعلينه بالوادم .. جا مو بالصيام يكولون اللهم اجعلها بقرة !! يعني حتى تصير عيونها حلوة .. نرجع لسالفتنا .. الوادم تحط بالباب دائما ام سبع عيون وهاي ام سبع عيون يحطونها علمود تمنع عيون الحاسود اللي بيها عود !! يعني السالفة غمة واكو تبذير هواي !! علمود عين وحدة وبيها عود يجوبون سبع عيون !! جا حقها الوادم من تكول : (الف عين لاجل عين .. ) انوب الف عين !! شكد عيب بس لا افتهمتوني صح .. ابو المثل يكول : الف عين ولا عدو واحد .. و(الف عين ) مو معناها هاي السيطرة مال الانضباط العسكري اللي تسوي ازدحامات وتفتش بالوادم وهي واجبها على العسكر مو على المدنيين !! لابويه .. العرب جانت تسمي التجسس بالعين .. فنحتاج الف عين بكل منطقة نحتاج عيووون يعني استخبارات مو اعيان !! خوش؟؟ لو موووووش خوش !! ترى العراقيين طيبين وهم الشعب الوحيد اللي يهدي للاخر اغلى مايملك حين يسلم عليه .. هسة شلونكم (عيوني ) ؟؟
