ياخذني لعيونك حنين
مرة أزعل ..
مرة أصالح ..
مرة أعاند..
ومرة الين….
چا وين تاخذني بعد..
وآنه وازتني السنين
تذكرين؟
تذكرين شلون من نزلن النجمات يمنه
چنه ملتفتين مدري لوين
من ذاك الطفل طيّر فراشاته بوجهنه
تذكرين شلون نزلت دمعه من عينچ
ونشفتها الفراشه؟
وچانن النجمات مستحيات منه ؟
تذكرين من رسمنا الغيمة عَالشباچ؟
چنه ملتفتين مدري لوين
من مطرت علينا
وساحت الألوان كلها عله الچراچف
كلشي بالغرفة انصبغ باللون الاحمر
ثيابنا والباب وفراشات الطفل
والحچي البينه
تذكرين شگد تذكرنا حچي
وشگد نسينا
تذكرين الوردة من فَتْحتْ بدينا
چنه ملتفتين مدري لوين
من خضر على العتبة حچينا..
شگد ضحكنا شگد بچينا
تذكرين شگلتي من گتلچ..
مدري ليش ومن شنهو زعلنا؟
چنه ملتفتين مدري لوين
من صرتي الفراشة وردت اصير آنه الطفل
طرتي مني بعيد..بعيد
طرتي عَالشباچ عَالبيبان
ع البردة الزغيرة
ومن نزلتي نزلت الدمعة
عله خدي
وما مسحتيها و..كبرنا
تذكرين من كبرنا شگد حزنا
شگد بچينا؟
