شفتج بالمزاد ايكود بيج الليل
مهرة امعذبه امن ازمان
بعيونج ربابه امن الحزن .. والويل
وبجتفج أثر للسوط
يمهدلة الكصايب .. سارحة اليا صوب
باعج مشتريج.. وكايدج جلاد
مسبية وأعرفج صرتي بيد أجناب
منفية وفراتج صار دم حسين
تعبانة ودجلتج ناي ما أونين
لايمعودة.. لتغمضين
تستاحش عليج الدنيه كلهه
وبعد تنعكشين
جدامج مصايب يامصايب
ليش تلتفتين؟
بمتونج نوايب يانوايب
بيمن اتأمنين ؟
أعرفج يابلادي..
يابلاد الخوف والحب والتعب
يامنبت الطيبين
أعرفج من جنت بالمهد
ونتي لوحدج اتلولين
أعرفج يابلادي ..
من كتبت اسمج على السبورة
من جان التراب البيج .. مابي دم
ومن جان النهار البيج
مابي هم
أعرفج زين..
أعرفج.. ليش شفتج بالمزاد
وطاح كلبي ..ودمعت هلعين
ياعين..
(ياعين ماجازيج ياعين)*
أدفوف الحرب جابولج
لمن طاحت أصابيعج
فلادكيتي بدفوف الخراب
وصحتي بيهم: عيب يمعودين
آنه العاشكة الولهانة بالثورات .. ياطيبين
آنه الشايلة التاريخ فوك اجتافي
والله آنه خلقني امن الجمر والطين
آنه الشاهدة اعله الكاع كلهه
ومن تدور الكاع..
تحلف بيه يازينين
ماني البلمزاد أنباع
ماتسوه بلياي السمه..
ولاتسوه حته الكاع
ياريت آنه ماربيت
ياريت آنه ميتة
ولاني بيد أجناب
ياريت…
مالوليت..
ياريت

العمارة 2017
* من أغنية لجبار عكار