أحتويك ..
أحتويك وأفرش سنيني إلك
علّ وعسى تغفه
أمد جناح عمري ويه كل خطوة
جملني بعد من عطر طاريك
وازرعني على جنون الوكت سعفة
أمشي وياك طول بطول
جلمة بجلمة ما املّن
واظل بنفس واهس روحي الترفة
هاك الروح ..
هاك الحيل..
هاك عيوني من مدة ولاشافت طعم للنوم .. ماتغفه !
تسأل عن كُبر كلبي
والسنين الما كظت وياك
ماحلمت بيوم بغصن عالشفة
واكلك ياغلاة الروح ماشفت الفرح
ماعرف كلبي النور
جنت انتظرك تمرني واعذرك
 وادعي .. كلمن عبد ظرفه
واتاني والوكت يمشي
اتاني والعمر سبحة
سبحة انفرطت بايدك
يانهر الورد متكلي شوكت ..
يعكد عسل حرفي وي مر حرفه
وبعدني وياك اتاني
هالبت ألمّ الراح من عمري واكظ جرفه
هلبت من تمر فد يوم
تنسى الوكت تتشلبه على روحي
وأحس بسوالفك لهفة
وأظل أهمس للنهر بإذنه
عساك تشوف روح الروح وتكله
أمس جانت هنا سمره
تفيض بكل محبة وشوك تسأل
 يمته الكاك يا فيّي .. يمته للهوه تنصفه