علي كصر النهار وطولنه الليل
خاطر بس ننام وما نحس بالجوع
علي يا ريته هسه ايمرنه عزرائيل
چيه كرصة خبز كضينه بيهه اسبوع
اختنك بينه الصبر حدّ ما صعد للراس
وضل ابراسنه يردم ردم موجوع
الجار الي يحس بالجار ما موجود
يا جار النمدله ايبدل الموضوع
يا عين اليظل بيهه الضوه موجود
لان ضي الشمع يطفه بكثر الدموع
ويكتلني العلم بالمدرسة ايرفعوه
ونه راسي اشعجب ما يدري ما مرفوع
فرحان المعلم يكتبلنه الدار
ونه داري لهسه ايجاره ما مدفوع
ومن ضعفي مشابك انه اخوي بيوم
اخافن بالشبك تجدح جدح لضلوع
ويدك بيه الوكت دكت مغاره ابليل
اليظل بيهه الصريخ ايخدش المفزوع
وكل هذه وعشت بس يا عيشه يا مولاي
عيشت شايب العاش ابكلب مشلوع
ورغم يمك علي بس ما شكيت بيوم
وكاح اهمومي ودري بحضرتك ممنوع
وچيه اعرفك علي هم شاعر وذواق
ردت شاعر يجي يشرحلك الموضوع
