حلاة الشجرة من تجهبها الطيور

ابتوت تشوفهن بجفوف الاغصان

واذكرمن تمرني مهندم احتار

يظل مو وجهي كلبي ايطلع اللوان

دمع كل صبح دوم يحن عالخدود

يفك ريج الجفن بس انته ما حان

انه ما بين غربة وبينك وبين

حبك والمهم ما لاكي عنوان

تهت بيك ودريتك مو درابين

شربتك عزة بس ليهسه عطشان

وردة ادري اذبلت ما مش نفس بيك

عطرك بيه غزر صرت  سندان 

جم دمعة استحت من اليضحكون

جم اشراع تاه ابدون سفان

جم سر انفضح وبذمه البير

سوالفنه صفت بحلوك خرسان

على المنجل اتشيخ السنبلة شلون

من شافت وكتنه ابدون ذرعان

اشتعلت نارك وحرحت شكو احساس

بيك ..  وانه بيه الضال دخان

سألوك على اسمي وما انداريت

وانه كلشي بحياتك مو منو فلان

ما استاهل وهسه انه مشمور

بجرف زعلك اوميلك وانه غركان

عذاب ودمعة تلكه بذكرك وياي

مواقف توكع من اعصرها الردان

لا نفعت رسايل لا امدارات

مات الساعي لبست سود بيبان

رغم كلهن وكلهن ما اهتميت

انته امنين ما باوعلك انسان

عكس كاظم  انه ناديت وهواي 

ومو يا زعل لا راح ابقه  زعلان