افز بليل أدور
بين ذيچ وهاي
مثل غرگان
لحظة موت
يتلاوه ويروج الماي
و أضل معاتت وي البال
ظليت اعله هذا الحال
وأروح وي الخلگ لبعيد
وارد اسأل
يخلگي شبيك وين تريد
ولك بهداي
شباقي من العمر خلصان
يالهمومك علت طوفان
تدريني انحلت لاحيل
ولابيدر همومي يشيل
صفي الراي صفي الراي
يالمعلم عالشمس والگيض
تموت من العرگ بلفيض
لا تفرح لو جاك المطر يرويك
گطرات الندى تكفيك
ياعوسج اشصار شبيك
تدور فياي
يبالي شبيك..شبيك اشصار
شجرة انته وشجرة انا
اموت تموت هم انته
خليها ولك سكته
لأن هذا الزمن صدگ
منشار اويگص بينه. رايح جاي
خليني اغني
وبل حزن مغناي
انا الحزني عشت وياه من اصباي
يبالي جوز مني عاد
ما اريد أبوهم انصاد
اريد اتمدد بطولي
اعله گد اغطاي
