فترة ونسينه العشرة ياهو الكالكم؟

يوميه اشر اخدودي من تطلع شمس

واستقبل الليل بنياحه انعالكم

واصفن واحطكم مملحة برف الجرح

وابالي يوميه صوركم تنمسح

من التراب امسحها خلو ابالكم

مشتاك اللمكم.. واحجي من ذاك الحجي اليحلالكم

ومشتاك اسولف جذب واجبر حالكم

ومشتاك اضوجكم شقى

لا والله حتلو بالصدك !! المهم وجهي اكبالكم

رحتوا ندى وي غبشة الشمات ليش؟ شمالكم؟

جا ورد روحي الذابل شسوالكم؟

جا بالجذب عفتولي بس خيالكم

واركض مثل دكة نبض دلالكم

وركضة ملاكه بخظوتي اختنكت ترى

وكطعان واهس بيه جني بمكبرة

ودموعي من هسه بدت تلزم عالملاكه سره

وانفاسي متحلفة عله شمه مخدرة

او واعدت هيلي عله طاري دلالكم

وشحوالكم ؟فر مني امس زاجل ضوه شودالكم؟

وفر مني امس داخل حسناهنا يمن جنا وجنت غنالكم

بس لا صدك ظلمت مثلي احوالكم؟!

تحجوني ؟لو ما انذكر

خايف غريب يدكله ثايه ابالكم!

بديت من ماييي علمود اصفالكم!

نجماتي مستحيات وين هلالكم؟

استبرد عنب روحي يريد اسلالكم

محتام اطش روحي ملح بجروحكم

ومحتام اشاقيكم وطلع روحكم

ومحتام اسير طيره فوك اسطوحكم

ومشتاك امرجح راحتي على احبالكم

من جنتوا جانت بس نوارس ضحكتي!

من جنتوا محد شاف سجة دمعتي

هسه اختنك واسطر النسمة بحسرتي‍ ‍!!

ودولي من عدكم نفس

ديرة اشباح برييتي

اوودولي اي شي لو ظرف مرسالكم

راح من الفراك انتهي شحسبالكم!