الشيب براسك استقرار 

يمعلمني احب الناس 

احب الجار كبل الدار 

يالتضحك بوجه الضيف 

يالضيفك المتعنيك والماجاي اعله البال 

عدك كلهه اجت خطار 

يالمدري شنو مضموم بمصلايتك والليل 

كله يخلص استغفار 

متجامل الما معدول متشوف العوج وتدير 

تكره عوجه البسمار 

تسهر ليلك ونرتاح 

كبله تطيح لو من عدنه واحد طاح 

شما اكبر اظل ازغير 

ما دامك علي فياي  

هنيالي اعله هيج اجناح 

اريد اوفيلك يالمتعوب 

يالجبت العمر تركض وبس حروب 

داست رجلك شجم نار 

والله احتار من احجيك 

انه جبت العمر بس اكتب واقراك 

حتى القلم بيك احتار 

احبك واعز من اصباي 

يالتعزف لحن مجروح 

خجل ضيمك شچم ناي 

تعبني المهم ترتاح 

تعبك راحتي بدنياي 

يالبكل سالفه ينگوك 

يحتاج المضيف الراي 

سري وحگي اگولنك  

شما احجيك 

اعجز من اسولف بيك 

غلطانين اليگولون سر كل الحياة الماي 

لا سر الحياة انته 

ابنك هيج يتمناك گبلك كون فاتحته