اوگف اجلالا الك يا والدي
وانحني الكل شيبه حلوة براسك
واطلب اتسامحني لو مرّة خطيت
او دون ما ادري جرحت احساسك
عطرك الطيّب اشمّه ابكل مكان
ابزغري شميّت الهوى امن انفاسك
وچنت احس حضنك الي ، وكلّش اغار
لو طفل غيري تدنّه او باسك
يا ملح عمري الوكت ماصخ وراك
او شحّوا احبابك او راحت ناسك
والوكت .. غير الوكت ، والدنيا ذيچ
العشرة ماظلّت حسب مقياسك
*************************
اگبالك ارجع طفل وانسه براسي شيب
واغفه يم رجليك انه او اطفالي
يمّك احساسين اعيش اب او ابن
واحس گلبي امن المشاكل خالي
تلاعب اطفالي وانه المحتاج اديك
ابدونهن والله الزمن شل حالي
حبي للدنيه ينسّيني اجيك
وادري هالحب للاسف كتّالي
ابّالي .. كومة صور غطاها التراب
و طيفك اجمل ما اشيله ابّالي
*************************
كلشي بيّه ايحن الك يا والدي
الضحكتك صوتك ، دعائك بالاذان
الهيبتك ، طولك ، حضورك ، دفو اديك
و صورتك بالبيت ، تنطيني الامان
واحفظ اسواليفك او بيهن اعيد
و درخ ادرخهن او چن عندي امتحان
فضلة اكلك عافيه ، او اشرب وراك
من مكان اشفايفك بالاستكان
والبس ابّدلاتك او بيهن اضيع
او اشم بيهن حيل ، ماخلّي مكان
هسه نفس المنطقه ، او بيتك قريب
بس احس اهواي باعدنه الزمان
