مرتضى الازرقي
امي البيت الاول گبل لاصير
ومن بعد الولاده اسكن حضنهه
وبياض عيونهه تعصرلنه ويسيل
تعصر عينهه ونشرب لبنهه
شيلتهه الستر تفرشهه علگاع
وتلف الليل وتشمره عله ابنهه
بهداوة ليلهه تفتش بالهموم
وتفك صدورنه وتاخذ حزنهه
وايام القصف تحضني لاخاف
تحط چفهه علاذني وتنسه اذنهه
ماشافت فرح بس شافت دموع
مادگ بابهه وماشفته طبهه
كلهه چفوف تصبح وكت الوداع
ورجع كون سالم تدعي ربهه
وراي شما اروحن تشمر الماي
تنسه چفوفهه وتشمر گلبهه
صورتهه خيالي من مشي وياي
وهله يمه اسمع بكل گاع اطبهه
نخله وحملت بعثوگهه الضيم
واذا صب الدمع ينزل رطبهه
وذا مرني البرد تنگلب بس نار
توج اظلوعهه وتشلع كربهه
تنجن لو مرض واگفلي علباب
بس لمن اطيب يرد وعيهه
ولأن خدهه خصب وصب الدموع
فوگ خدودهه مخضر بچيهه
يموت الجوع يمهه وابقه شبعان
واذا ماصح خبز تخبزلي اديهه
انطوني اعتزل ماصمم ازياء
لأن لمن نظرهه احتار بيهه
امي شگد انيقه بلبسة السود
ورگعة ثوبهه تخبل عليهه
