ذاك الباب..

كلما ينفتح ينشاف طولك رجفة بالمفتاح

والعتبَة تِشد لِعب الرموش اجناح

ياشوفة نهر..،

واشلون الك وكت العصر مصباح

وانسَه..،

ابيا امراية الكَه القميص احمر..،

واعرفَك جيت .

بس بمرايتك وجهي اشوفَه اثنين وارتاح .

من كَتلي حلو..،

ما ظَل عطر بالسوك..،

لا وردة ابحديقة الما خطت للبيت

واظن آنه حلو مو بيّه..حلو بيك..،

النهر جرفين..، لوما الماي ما بيه روح

وانته اوياي من ماي العروس امرجفين ارواح.

ذاك الباب..،

مفتاحه ولا مفتاح../

دمعة فرح فضيّة انتجت عالخد ، حلاتي ابشوفتك تنلاح .

….،

يا نهر العمر..،

راويني دكَة باب يسمعها الكَلب../

دكَه مو من جرس ،من اصبع المحبَس…