خطابه علی ذاك الطين اجيتج والدليلة طيور …
اجيت بضهري شايل جيل …
وحايك صايتي من الهيل …
كالولي …
ماشافتها تسمع سمع عتبة باب …
كالو ضهرج يأذيج كدما ساجدة بمحراب …
كدما ماباجيه علی حسين …
كالو من يمر عاشور نشتم بالسلف عطاب …
كالو من تمر نسمة وتحرك زلوف تتحجبين …
مر برية الغربة …
تتمكيج عليج هواي كلولي …
بس تتمكيج بتربة …
يالكردالتج من طين سبحه مزورة بحيدر …
يالطولج ولا لچحنه المرايات …
كالن من يمر قرص الوجه تخدر …
يبت الهيل …
فاحت ريحة الكهوة وحجي الجمرة ولا يعذر …
للملاگه …
للملاگه الگناطر موش بس للدوس …
عدها العيد اذا شمت رجل تعبر …
الربيع شكد حلو بس للشلب تابوت …
السنابل صفرة خاطف لونها المنجل …
كلش مو وقار الشيب موتت كاع …
الليل شكد حلو بس بيه ورد يذبل …
يبت الماي …
حجي الغيم يترس واهس العاكول …
يبنيه النهر بس صيت …
مايجرم شبر عالراك اذا ماهوس الناعور …
يحنطة ورايدة مداراة … بي واهس سلف ناطور …
كلها دنان ماتترس خلك جوعان …
وانتي سوالفج مشخاب …
نسوان السلف تتمكيج بطاريج …
ويشدن علك بالباب …
يتحنحن من يطب الغرفتج عصفور …
امج من تطبلج تلبسين حجاب …
يومية الستر عندج يمر خطار …
يتوضه بزلف وكصايبج محراب ٠٠٠
خدج رايج وبيه يسكر الرمان …
وتثمل من تجيس جفوفج الوردة …
وكالولي علی زلفج ماطرب وي ريح …
ولا بير البكصتج بالحجي تبده …
خصرج تارس عيون الكصب حسرات …
علی شفتج الديرم لكه عويفيته …
سنبل رمشج يخاوي الفلح والطير …
يم جفنج المرود لبس خاجيته …
يمكن ثامن اعجوبة الكصيبة تصير …
ويدافنشي بكذلتج لو درة يحير …
عشرة شعرج وي الشال عشرة بردي وي الطين …
سترج والكصايب هاي حتی ابليس مايندل دربهن وين …
