اي صلفين …
ونبوك الحكل والعين …
والعاكول يتصدق على البربين …
والناعور ظل ينكل بالملح عالطين …
من تبركعن عاهرنه وام الدين …
من صفك زعلنه وضحك بينه الغيظ …
من توسد العش وغفه العربيد …
من ظم وجهه عالعصفور غصن التين …
((من صحنه على ابو الجنيب مشيك زين … ))
((من حاجينه الاعور ها كريم العين !!! … ))
من فرهدنه مال الله بتوالي الليل …
بس من غبشه نبجي ونلطم على حسين …
هسه نصفك العيسى …
وامس صيحنه مريم جبتي هذا منين …
من عطشت ضمايرنه على وشلة راي …
من عطشت كصصنه وشرك بيها الماي …
من يبست الضحكه بشفة الحديثات …
من ماحجت كلشي عيون المرايات …
من زفينه شايبنه على بت عشرين …
بطنه تخوخي جاري ونام من الجوع …
واحنه انام شبعانين …
من عشنه بترف ماعايشه الحجاج …
بس نلبس عمامه وهدم ابو الحسنين …
من نصنع صنمنه ويحكم نخليه …
وندثرة بعباة ابليس ونغطيه …
ومن يسلخ جلدنه هواي متعجبين …
من طبت احزاب وكثرن الخالات …
كل خمسه بكتر فصلنه هيج الدين …
من طولنه لحية نغطي بيها العيب …
من رخصنه عرض الناس …
من كمنه من المصلى على طگ الكاس …
من كشخت الضحكة بشفة المعزين …
كل جيل يتجدد شمر عدنه بلون …
بس ياجيل منهن طلعنه حسين …
من اعتمدت الصحبة على ثكل الجيب …
من راحت الحوبه وما يعثر الشيب …
من ساوت عكلنه الشيخ والرعيان …
جي كبل الزلم وتسولف النسوان …
واحنه الجنه ضحگة ادلي المتيهين .
