بيوم الجمعة وغبشة الدنيا اندك الباب 

فزيت من النوم مفرفح حسبت لهالشغلة حساب 

لني بفتحة بابي اتلكه صاحب وجه مغطه تراب 

كلشي البيه انهد بوكته سولفلي احجيلي وبس كلي 

كلي الله الذب بيك مصاب 

وانباك الحيل من جدامي كلي اهلك يالخايب راحوا 

كتله ادريهم راحوا همه واليوم العصر يردون 

جان يكلي راحوا لله

 امشينة بسرعة و ودعهم فد شويه ويندفنون

 كتله شتحجي والف اسم الله بيه ولابيهم بس كون 

لن اسمع صوت اليتكرب هوسه وبجي وحس نسوان 

وبمصابي الصار وحسيته الشامت جاي شكد حزنان 

وهنانه اتاكدلي الموقف كمت الطم حيل اعله الراس 

الفاكد ناس تعلق بيهم  جن فاكد كل هاي الناس 

وركضت بحيلي ورحتلهم لنهم كلهم متوفين 

ياعين يعينج بس الله بهالحيرة اعليمن تبجين 

مصدوم واتهمس بيهم والعبرة البيه بشطين 

ترفين بدنياكم جنتوا وحتى بموتتكم ترفين 

ياناس اترجاكم فهموا انا الفاكد ام وخوان 

شيفيد مواساكم ليه وانا انكسرتلي الجنحان 

خلوني وخل حزني بكيفه ياكل بيه اشكال الوان 

يمه بداعت ابنج ردي ما بيه اتحمل فركاج 

هاي الدنيا تحب موادع وين انطي  الوجه من جفاج

لو لية تردين وهسه لو هسه تموتيني وياج  

صح جبير وبس احتاجج شنو نفع الكصبة بلا ناي 

من هسة فراكج ديمثل دور السيف بنص كفاي

الدنيا بدونج جنها حجارة وانا البيها جن كزاز 

شما تاخذ خطوة بممشاها تاخذ مني حفنة اعزاز 

وانا العايش والموعايش بية انجمعن هيج بساع 

ويايمه تعرفين بطبعي ارجف لو مر طاري وداع 

بس هاي الدنيا وشنسوي لازم نرضى بكل الصار 

كاغد باقي بهاي الدنيا شما ادير الوجه الكه النار