امنين أجييك؟
امنين أجيبك … والورد ضمك علي اسنين
والغيمة الزراكيه الشرد بها الخريف ابين الشبابيج
تسهر بيك للقداح ،
وتسولف للفناجين ،
وتنكطك حلى فوك القصايد ،
انت لو ما نقطت يا روحي تحت ( الباء )
جا كلمة الرب لليوم ظلت فارغة من المعنى ظلت
جا بقى عمر البشر ليل
وبجي
وبلايه حب
كبلك الحب ماله ديرة ، اولا مدينة ، اولا هو حب
اولا بساتين الهوى… مر الهوى بيها ، وسكر بالتين
بلبل
بغيرك المعنى بلا معنى
وأنا ما مش
أنا حزنين .. واتلاثه .. وثلثمية
برد كهوة انطفت بالغربة….. كلمن رجع لهله
وآنه وحدي .. لا أهل
لا بيت ،
لا شوك اليدفيني ويلمني
ديرة الحبيتها .. وك ضيعتني
بعد ياهو بليل هالغربة ايعرفني ،
عالرصيف ..،
وظهري للكهوة .. ووراي الريح واكبالي
البحر بالظلمة جوله
جوله ترسم صوت ذيب … ايصيح ،
ويلم الضواري ، وآنه وحدي
ومنهو الي؟
جوله .. وتجن العواصف … لا ضوه ،
لا باب ،
لا شباج
لا كطرة ندى
لا من درب ضيع ادروبه ، ومر علي
امنين يا كلبي طريق البيت ؟
وامي الواكفه اعله الباب .. تحضني وتشب دموع
– وينك
يا بعد روحي على افراكك عميت
خضر النسيان بغيابك على البيبان
خضر النسيان بثيابي وعلى ضلوعي عشب
وأنت بعيد ..
اولا حسبت احساب كلب أمك
يبعد أمك واجيت
أوووووووووووف
لو تدري الضواري أشكثر بغيابك اجوا سألوا عليك
دوروا إثيابك ، وريحة ريحتك ، والكتب
والقمصان ،
دوروا شيبه .. شيبه العمر
خافن بيه كلمه ؛
لو ضوه من دمع عينك.. بي أثر منك نسيت
دوروا العام اليجي
وبعده اليجي
خافن تجي وتضمك امن عيونهم غفله ومنام
وجيه اشم إثيابك الضميتهن بعيوني كل ليله
كبل ما نام .. عرفوا ريحتي ، من ريحتك
يرويحتي ،
ودوروا منامي والأحلام
همه عرفوا ريحتك .. يا ريحتي
وريحة هلي ،
ريحة النخلة وغرام الطيره التغني إلي
ما نسوا كل شي ، ونسوا كل شي نسوا
انت كل هذا العليه لساني أعيش
انت كل هذا الهوى…. وكل
الضوه
كل الفرح
كل الحزن
كل البرد
كل البعد
نومة الصيف ، وجرف لذة السعد
ريحة الماي ، وبساتين الزغر
لعب كل شوك العمر
وجيه يبعد الروح صار اغيابك بلون الهجر
آنه لبست الهجر حجلي
ومعاضيدي
وتراجيي الشذر ،
يا بعد عمر الغوى
وكحل الهوى
وعرس العمر .
