مدري ليش ارتاح للوجه الثكيل 

مدري ليش يروح وابقى مناطره ..

انا عكس  الناس اموتن  عالقليل

والمصيبة هوايه اعوف الخاطره ..

وحيل كاعد الك يبو احساس  البخيل 

كعدت الجف على وجه الساطره ..

والله ماكدر اعوفك  مستحيل

شلون اصوم اكبال عالم فاطره ..

 كبال بيتك ياحمد شميت هيل

وصوت كهوة و دمع ناس مسافره ..

من كثر ما تجي وما بيه  حيل 

صاير انسى جفوفي فوق الخاصرة ..

 وصارت الفزة مثل فزت العليل 

النايم ومن لحمه زلو ظافره ..

صاير من ابجي عليك بدنيا ليل 

ثاني يوم تكول يمكن ماطره ..

هذا الي بعيني دمع مو مي  سبيل 

ويا بخت على الوجه كل ساعة شامره ..

جنت اظوج وازعل واتمى  عيل 

لاكن اعرفه مشاعر عابره ..

من تجيني بكلمة وحده تفرني حيل 

سبحة وافترت بصابع كافرة ..

 والله لو ماحب فلا يكدرلي ليل 

ولابجيت ولا بقيت مساهرة …

ولا طحت يمك مثل طيحت دخيل 

وجان فاركت التتن المعاشره ..

بس الي حب بجذب لو شي قليل 

مثل اللي يسب الشريفة الطاهرة ..

جنت يمك خيط بس اطخني اميل 

 وانت تشمت بكلبي الكاسره ..

حيل بيه وكون اكضيه دليل 

شلون اصير حزاب يم السافرة ..