انكسر جنحي وبعيدة هواي الاشجار
وصرت احجاية بحلوك المصاييد
امن اول ماخلفت بموعدك ذاك
من عدهه وكرهت اسم المواعيد
السجن اخر محطة بعمر الطيور
وانه مسجون واذنوبي التغاريد
برودك صاير بكد ضعفي وياك
وانه شايل حرورة دم هواديد
ازدواجي وفوضويتك ذبحت الشوك
تكص اجفوفي وتنزل العناكيد
تلكيتك بسعفة وجامع وشوك
وتلكت ناكتك لو رادت تهيد
ردتني وياك اصيرن مثل وياي
وجنت بغيض ناسك تمدح تشيد
وانه تربات وادم تعرف العيب
بالماي العكر ماتعرف تصيد
مو صياد شفتك بيدي الجناح
كسرته وصفكتلك تعرف تصيد
مرات الكلايد كلمة من ناس
مو شرط الكلايد تنحط بجيد
مو بس الحديد يصير مفتاح
الصبر موقف وينعد عالمفاتيح
الرسايل مو شرط بأوراق واقلام
مرات الرسالة تصير تلويح
مو كلمن كتل مكروه ياناس
كتال الذنوب يصير تسبيح
هلكد ماتروح وترجع وياي
كمت اذكرك يم المراجيح
تشعل شمعتك من يخلص الليل
وتضم الشراع بجيت الريح
الي دكوا صدرهم طعنوا كفاي
بس ظلك كبل ماتوكع يطيح
مواسم دنيتك ماتعرف اتدوم
عميه تصير بالغبشة المصابيح
هاي الدنيا كلهه اوهام بأوهام
وحتى البيهه صح يريد تصحيح
