سولفنه، حزنه بسكتة الحيطان
وناوشنه عطشنه الغيمة الاحزان
وردينه سنابل ثكل بينه الشوك
وردناها المناجل تكسر القضبان
على وجوه الرسايل عرس عدها النار
تشب احلامنه ويتمركص الدخان
بعناوين السفر تلكه البشر تمثال
مهجورة المحطة وتنعق الغربان
يامه وكلنه يامه وسلف بينه يجور
لاحزني التعده ولاالجرح ينهان
صارعنه العفه والناس والصايود
وخاوينه التعب من دكة البيبان
نتلكه الحزن ملكه الزرع للماي
نكابر والمكابر حطب للنيران
على جرف النهر جم ذكرى ماتت شوك
سطرات النهر متخلي ابد نيشان
نوبات الجروح من العمه صحيك
بطعنات المساحي يخضر البستان
من عضهن ندم نجوي الجفوف النوب
واذا ميفيد بيها نكطع الذرعان
تتثاوب الكمره بوجه ذاك الليل
وبحضن النهر يلتمن الخلان
لمعنه من السيوف تضوي وكت الموت
وهدينه مراقد يم ندى الاذان
حوينه الكلشي صح وماغلطنه براي
وعرفنه الحب وطن ينبع منل شريان
تمنينه نشب نار على حضن الخيط
وردنه نصير نسمة برية الغركان
مانهتم ابد مهما الثكال تعيش
على ناي الحزن تتونس الرعيان
اذا شفت الدلال تبوس خد الكاع
تتغنه الملامة برية الفنجان
ضنينه النودهم شمع وكت الليل
صحره كلوبهم والوجه جن دفان
نظل دوم نتسامر فوك غصن الياس
وناوش عطشنه الغيمة الاحزان.
