ريسان الخزعلي

* رگصة عطر *

* أَسمعك ..

تنده إبروحي ..،

تدوّر عن رفيفك وين..!

. . . ،

إنتَ رفيفك عطر..

لو ينسمع..

چا شفت رُگصي إشكثر..،

چا بعد ما دورت.. چا گلت خجلان أرد.

. . . ،

العطر/ موسيقى  ما تنسمع..

وآنه سمعت العطر..،

من چان بعده ورد.

* حزن سومري *

* بعد ما مش..

ولا موسم فرح غلطان…،

مر إبشجرة الصفصاف وانحسبت عله البستان..1

بعد ما مش حلم..،

بيه تعبر الدنيه مثل جدّك ..،

تجيب إلنه /نبت/ مضموم ما ينلاح..،

وانگول الولد حلمان..!!

وأمك علّمت حته الملك حكمه..،

گبل جية الوحي..، إو باللوح خطّت لافته إو عنوان/

– أصابيعي عنب..

لو چان ريگك حنظل إو عطشان.

. . . ،

وأظن حزنك ثگل كلّش ولا يتعادل إبميزان.

– حزنك جمرة التاريخ والطوفان.

* ماي العروس *

* مستاحش..

نهر.. والليله روحي إبعازة المشحوف..،

مثل وحشة إمرايه

إبغير دورة وجه..،

وگلاده..،

وگُصر نفنوف.

. . . ،

مستاحش..

شَعَلْ فانوسه گلبي الظُهر..

يا هلبت خيال إضيوف.

. . . ،

واندار الصحو كَسرة نعاس..،

إو طاف بيّه الچان بيّه إيطوف.

وإجه /ماي العروس/ إبنومة الحلمان…،

ندهله الخاصره..،

إو حدر الضلع فزز رفيف إدفوف.

. . . ،

نِزعَتْ الثوب المقلّم..

مثل كل مرّه أضمّه إبدورة الطوف.

عُبر ..

ماي ..

العروس ..،

البيه چنت غرگان…،

والمثلي ..

يضوگه إبغير شفّه إو رجفة إچفوف..!!

ـــــــــــــــــــــــــــــــ

* ماي العروس/ تسمية جنوبية لمياه النهر الأبرد، وعادة ما تكون في منتصف العمق، يغطس اليها السابحون، يشربونها بلذة وانتشاء، كما انهم يقدمون الماء البارد للعروس في غاية معروفة، إضافة لتدليلها في أيام العرس.