امخليك … انه امخليك 

من تطفي الليالي اضويك 

يالنايم ابخلكي اسنين  

اتجوه اعله نارك ، ماكلتلي اشبيك 

وانا امخليك 

أورثك بالجكارة اهموم 

واتكاتل زعل من تخلص واطفيك 

ياعشك الصبا المجنون 

ويا أول نبع ورد على العشرين 

ويا أول صبح يتشابك اويه الروح

راواني الشمس بمراية العينين 

ياغصن المحبة وكلبي بيه عنكود 

ياخذني البرد ومن النده امد فيك 

أكيل مشتهانك وي لهيب الروح 

اطفه واشتعل واتلهوك ابطاريك 

يا اطلس خرايط عمري التعبان 

ويابحار روحي ابيا بحر الكيك 

التف بالخطر ويلفني جف الريح 

ومدري اباولك مدريني ابتاليك 

واصبر وطك سن وخوف يسند خوف

يامتحف عذابي اشلون اعثر بيك 

ومتانيك 

ولملمت الشبج واتفرفح اعله الصيد

 ومدريت الشبج يلتف علي وانصاد 

واتكوى ارد اخلص روحي واهفت لوم 

من روحي الرخت ومعاند الصياد 

أتوجه وعذابك سوط يلحك سوط 

واعاند واعترافي ايدوخ الجلاد 

واكف سنبلة .. عطشان.. شح الماي 

من شفت المناجل غافيه ابجاليك 

كترت القصيدة وصابني الدوار 

من شفتك بطل للمسرحية وذيب 

هنوك ابحرارة وشالك التصفيك 

وفزت ابكل جوائز حفلة التعذيب.