على الوانه وجه مايفرض الرسام

اذا مو بالخيال يحبه ميرسمه

شگد تمر صور يرسمهه بس تروح

اول لوحة تبقه براسه من يعمه

شهضمك ونته باهت ماتحرك الروح

موس وعالوتر مايطلع بنغمة

ولا بيك انته واهس خاطر انسه الراح

شگد گلبت ليلك ماشفت نجمة

گصبة ابريه وتريد احسبك ناي

شما اسولف عليك احساسي متفهمه

الترف من مايسولف باذن ترفه يموت

وانته اخشونه بيك تموت الچلمة

ااخ من الفشل مو جان بيدي الماي

عمر ضيعت مني احجاية الزحمة

محصولي وخسرته شينفع العنگود

حلگ ياسلة اسكت كلهه ملتمة

صح هوه الملح والشكر نفس الون

بس جيب الجرح ليعاشره بلجمة

وجيب اليقنع الخياط ثوبه اگصير

وجاب الليل كله يفصل بهدمه

ماتلزم سهر من ليل خاوه شموع

وركضن عالضباب انجومه متلثمة

راكد و البحر لوركد يعني اشتاگ

لثر اول سفينة يريد يشتمه

غني لمات مايستاحش من الصوت

ولايفرزن خشن لو ناعم اليمه

شيرده البخور الشربته الحيطان

الشبع ماي وغرگ مايرجع بنسمة

من ترمد اعيون الاعمه مو موجوع

بحلم غربة انده مو من اهل حلمه

والاخرس من تفطر اشفافه مو عطشان

حچي بيهن عتگ بس محد يفهمه

الصگر لو شيب يحط وين متصح گاع

بعد ميغره جنحه ولاكبر حجمه

اذ تريد الصدگ مو حلمي واقنع بيك

الغميج اصوابه يرضه بطلقة الرحمة.