بدت رحلة وداع بجنه بالليل
وطلعنه من الرحم واتسرگ الباب
ما ندري الحياة شلون ما لون
ذيج الساع اهلنه انحسبوا اغراب
باول يوم رحنه بسفرة ادموع
بجينه وما عرفنه شنهي الاسباب
اثاري الطفل هم يستبصر الغيب
لذلك هملن ادموعه اعله الاثياب
عرف بيه الوكت ميشيل موهوب
يصد لابن الغزال بعين الاذياب
عشناها الطفولة يحوطنه العوز
الناس الضحكة واحنه اكماطنه انكاب
يجينه العيد غبشة يدك على الباب
نقفل بابنه انخاف من الاغراب
نسمع بالدوالب والمراجيح
وابو جيوب العمي ميشوف دولاب
كالولي الفقير وگلت موعيب
انه من طين قابل البس اتراب
كلشي يهون بس لا مدة الايد
وخفت لا امدها گمت اتمنه تنعاب
علي رب الغنه وما لبس حسين
يخجل لا يتيم يصدله بعتاب
وكبرنه ابونه خيرة الناس
وبعدنه امن الطفولة انشيل الاصواب
حضرنه المدرسة ونتعلم انريد
ما ردنه الغياب وصرنه غياب
عفنه اقلامنه وشلنه الچواكيج
نموت بدمنه من انشوف طلاب
وانه بسوگ التعب معروض ايجار
وعلى روحي صرت للناس رغاب
ياخذني الصبح ويجيبني الليل
يسوه التعب بس ما تسوه الاتعاب
