محمد فاضل العبودي

حسبالي العمر محسوب بالشيب

كل ظني الجفن يتطرك اسنين

اشو باول محطة وبين الشيب

وعله كد الحزن تتطرك العين

كل واهس حسنه اتطشر بريح

مشه بينه العمر مشية سجاجين

اكل نظراته التارسهن الشوك

بقينه اعله اليجي نتساءل منين ؟!

لادرب اليلمنه ونندل الضاع

واخافن نمشي هم تضيع رجلين

ولاجف اليلوح اطراف الاجفوف

واليندلني خاف يبوك جفين

واسمع صوت ناس تدور بناس

ماظلت اجفوف وبقوا بس طين

باكوا كل نفس برياكهم بات

واتاجر بعضهم دمعة العين

ناس ابلا مشاعر عدهم افلوس

وناس ابلا خبز باعت شرايين

ودارو بالثلج والكاس الاحساس 

شربوا نخب كوس بذمة الدين

بقينه احنه علينه يدور الخوف

وبدلنه الوجوه اوجوه ميتين

نزعنه اوجوهنه ابخد الرصف شوف

وداستهه الجدم دوست مجانين !

وهي اجدام داست خبز بالكاع

وهي اجدام داست صدر الحسين

نفس ايامهم ونعادت اليوم

الفرق بيناتهم تاريخ الاسنين

ونفس الباك محبس من الحسين

هسه يبوكنه والعين بالعين