مو انت الجبل وتعاشره غيوم

ولا تعرف الصخرة وياهو اليسيل

مثل فلاح عيش الماي والكاع

اذا مايلكه ذني بهيبته يشيل

شنهي الجابرك ع البير مرات

مو كلمن يطبله يصيرله دخيل

دست الماي بس جوه اختنك ماي

معبر لا تصير اجدامك اتعيل

واذا ناعور اعذرك خلكك وياك

شوكت تغرفني وانه وشالة النيل

واذا ع الصيده تحفظ صوت رجليك

مو صياد اعرفه الما حسب ميل

كعبه تصير سهله استقبل الناس

اخاف اعليك تاخذ لثكة الفيل

واخاف تسولف القران للغير

وتلكه الما تحبه يرتل انجيل

خذيت اعنانها وطكيت ذرعان

مو شغلة خفيف تسابكن خيل

باوع عالغراب شما عله يضوج

مامهيوب لو يلبس كمر ليل

واخذ طبع المطر كطرة ويرن صوت

وانت صياح كهفك مازعج ريل

صعدت الغيم بس ريشة الثكل بيك

وانه اهنا اسولف وانتشر هيل