على الواهس ،
تعال الليلة نادمني ،
واخذني لوردة الغبشة .
حزني الليلة كلّش مو مثل حزني .
يالطولك جفن نعسان ،
يالمايع مثل رعشة ،
بيك آمن العنب ليلة سكر واكثر .
بخيالك يسكر الواهس …
ودندن بيك بالوحشة .
يالوجهك مقامات العشك …
والعود والدهشة ،
تعال الليلة سامرني ،
ودندن بيك عالواهس ،
أصيرن لك خصر …….
واركص على الواهس ،
واطوّح واشتعل كمرة سكر …..
والكَمر يتغشه .
يالمايع مثل رعشة ،
تعال الليلة ادندن بيك .
دفّيني بطعم صوتك ،
حزين وباردة الوحشة.
