انا امن المعاتب من صدگ عفيت
گالولي شجاك اتهرفلت جنيت
نعم جنيت ماظل بالعقل ميزان
واشتبكن ابراسي الحيف والياريت
تهجاني ضميري اوشد علگ بالروح
قبلت العطوة مرغم واعرف اتماديت
بالإس كابرت لكن رحت فرهود
هجوني ابموش ثوبي اوفصولهن فيت
نوبة اسكت محبة اونوبة اعاتب طيب
اونوبات امن اشاچچ بالملح غصيت
تترس عيني ضحچة امن ارد اگلهم ليش
والضحكة العليه ابلعها وتغاضيت
توضوا ماي وجهي اوسبحوا لبليس
وانا لمستحاي ابگصتي اتوضيت
جامع چان گلبي اوقصر صلوا بيه
وانا الهم نوافل والفرض صليت
طافوا بالنفاهة اعليه سبع اشواط
اومن ضاگت وحيدا هرولت بالبيت
چنت ابطولي احاجز بينهم والعوز
اعس بيهم واحس امن الگفه اندچيت
جيوب الورچ تصفر صحت بيهن وير
هدلن من اديه ابكثر مامديت
شكرا ماكو عدهم كله هات اوجيب
وانا ابغير عرفه مشكبنات اطيت
الحيهم فوگ شفتي اتهز چتف للجاي
ومن اجبل عليهم لاهله اولاجيت
غبت اسنين ماطارش لفه اونشاد
وانا الظهر عدهم والعشه اشتاگيت
الحچي البگفاي يوصل مثل ماگالوه
سووا كلشي بيه اوكلشي ماسويت
والبد واعرگ الهم خاف ينحرجون
وانا ادري ابحلمهم ابرها اتراويت
جروحي اشواية الله امعدلات اشراف
ياهو الارد اخيطه ايصيحلي اتعافيت
لملمت التعب والالم والاهات
حدر كتري انزويت اوفوگهن گفيت
وسولف وي صفنتي اوخاطري المكسور
مرة اقره الحطيئة اومرة شعر اكميت
واترجه اليزتني الحضن داحي الباب
واليم علي يشرغد شارة بي وبخيت.
