عمري خلص هاولك شتسوي جاي
يالخسرتك بعد ماريدك ربح
ولوكلبي لهسه يوجعني عليك
لادك بابه بعد ماينفتح
موش بيدي الكلب يعرف دكة أديك
ويدري بالدك بابه عاقل لو وكح
ويدري أنته الليل بس موخوش ليل
تغفه بيك العين ويفز الجرح
أدري أنته الماي وعطش من تروح
ماأدنك راسي شح شماتشح
ماتموت الكاع أذا مابيها ماي
تموت أذا ماباست جفوف الفلح
ورغم كل هذا الكلب جويته ليش
حتى مايتوهم بواحد جبح
ليل شكلك مجبن ومابي سرور
وبظلامك عالبشر بالك تلح
مثل كطرات النده حتى من أطيح
من بقاياك أغسل خدود الصبح
تكلي جيتك لصلح ياصلح هاذ
أثر طعناتك بعد ماتنمسح
هاي سجينك بعدها بنص كفاي
شيل سجينك وسولف عصلح
أنه بيه الجرح من يسكت يموت
ومو فرح لو ركص من ظيم الملح
سايم الله عليك أوكف لاتروح
ماأسولف قصتي يطول الشرح
أرد أذكرك تدري بيه أنته شنسيت
مومحبه بكلبي ناسيلك رمح
