كلشي ايشيخ تدري التكثر اسنينه
لچن حزبي يظلن شاب بس تكثر محبينه
بگلوب الشعب يسري ثيل اخضر بطينه
اكوه من المنيه احنه بصوته صاح حادينه
جم ريح اعصفت بينه ظنه اتريد تلوينه
وتلملم كل ظلام الكون
شمعه احنه دگلي اشلون يطفينه
لسعاد الشعب نسعه
حر الوطن نبنيله
تحت جنحه العراق التم.. بهدافه يخاوينه
من الهور لجباله شوكة نار بگلوب اليعادينا
شدة ورد لمتنه والطيبة قميص امفصل علينه
كل واحد شرب ميته
شما يبعد يرد لينه
لأجل الوطن ضحينه ما نأمل يجازينه
مسيحي ومسلم وصبي ومتخاوين
بس كلمن عله دينه
الوثبتنه الجسر يشهد
من دمنه تحنه وباس رجلينه
(قطار الموت) ما شل من عزيمتنه
ولا (قصر النهاية) بكل زنازينه
وظنو نگرة السلمان تثنينه
لچن آمالهم خابت تحول مدرسة لينه
يگولون الشهيد ايطيح
بس عدنه يعلى فوگ وبدمه يضوينه
ويظنون الشهادة للرجال وبس
واحنه باستشهاد كوثرنه ورجاء*
ابفخر خالفنه السنينه
تربينه اعله حب الناس
ونريد السلام ايعم اراضينه
هذوله احنه گلب ابيض
مثل اسنين ماضينه
انولدنه من رحم تاريخ
صرنه انجوم من يگدر يطفينه
صرنه انجوم من يگدر يطفينه
