اكابر ماشكيت ابرغم كلي احزان
اشوف الشكوه ذله الغير سامعها
ولا اطلع دمعتي اكبال ياهو الجان
كدام اي شخص تنكشف مانعها
حتى اكبال روحي وحتى لو حزنان
جوه اغطاي سكته اهناك اطلعها
يتهمني البعض جيف ابتسم فرحان
ومايدري ابسمتي الدمعه ارجعها
خاف اكبال شامت عالرموش اتبان
واتخلي الخدود اتصير شارعها
امسايس وي دمعتي امن الزغر للان
بالا والفشل والعيب قانعها
رغم بعض اصدقائي العادهم صحبان
واحدهم صحبته ابزله بايعها
وانه الكل صديق احتاج والقران
لو يطلبله عين اعيوني اشلعها
اغربل باصدقائي ابمنخل الخوان
وما اباوع لجوه اعيوني رافعها
خاف ابعيني اشوف الصاحب التعبان
عالسبعين محمل دوم اوزعها
اغلس على الجلمه التخدش الاذان
ماجن ترس اذني الجلمه سامعها
واسامح دوم اسامح من كلب والسان
والغلطه الصديقي ابضحكه اوكعها
لان كلبي مضيف اواسع البيبان
بيبانه اعله كبر الخوه اشرعها
ابشرط صاحب يكون افلان مو فلتان
اذكر بيه طيبه ابكلبي زارعها
اجمع كل صفات الطيبه والاحسان
اذا صاحب غلط والغلطه راجعها
واكره كل شخص من ينسه هوه انسان
بس تنمدله ايد ايعض اصابعها
علمني الزمان الحكمه والعرفان
وادروسه ابوشم عالكلب طابعها
وخاف ابيو انسه وينمحي النيشان
ليليه الدروس ابالي اراجعها
ابض عنبر وماصرت يوم ادنان
بيه الناس تاكل وانه اشبعها
