صفنة موت ، …..
مرجوحة العيد وضحكة الأطفال ،وآغصان الشجر والرازقي الفـوّاح .دخان وعشب أسود ،
وثياب السواجي آرمال .
الدنيا مِغِبْـره ……
ولا ندى اليغسل ورك شجره …..
ويفك آعيون الولايه ……..
ويشع منها الضوه شلال .
لا ليل اليطك بالروح كَمره …..
ويفترهلك بال .
خبطت ، والكَمر موذاك الآول ،
والليالي آثكَـال ،
والغبشه عروس آمزوّكَه بالدم ،
شرايط من نزف تنكَاد للمحراب ،
تتوضه آبطعمها آذياب ،
وبلال المناره آغراب .
يا مكَرود ،
يا صوت السمه يبلال ،
ماظل لك وتر فوك المناره ……..
ولا حرف موال .
صفيت آحجاية التنكَـال .
لغبه ،… وكَصّـة الشيطان ……
تاكل وجه المصلّى ،
ونبي آخر زمن تمثال .
عين الله آعلى طولج ياخدر ، ياكَاع ، يا بيت الخبز والماي ،
والحب والحزن والدمع والموال ،
يا طلكَـة آمعسره آلمدري يمته آتجيب .
هلكَد راضعه آدموع وحزن هالكَاع !!
أول كَطره من دم البشر…….
طاحت آبهاي الكَاع ،…..
وآشتمّت عطرها آجيال .
أول دمعه من عين البشر …..
سالت آبهاي الكَاع …..
وبيها آتملّحت آجيال .
اِهنا أول محب مجتول ،
اِهنا أول حجر جتّـال .
يا خدر البخت ، ياكَاع ،
يلويني البجي المسجون ،
وآتلاكَـه آويا وجهج وآعتدل بالحال .
صفنة موت تاخذني ،
وآتلهّه بأصابـع نار ،
وآشوفج بين آصابيعي وآفـز بالحال .
أفك شباج من روحي لشمس باجر ،
أغرك بالضوه وما تبقى ليّه آظلال ،اتنفس هوه باجر ،
يردلي الحيل والواهس ودمي الحار ،أتوهّج على ظهر الوجع خيّال ،
والبسمه أعلى وجهي آهلال .
